Ольга Шупшина: «Әбиләр сандыгы – халык хәтеренең көзгесе»

«Керәшеннәр – үз тарихын, гореф-гадәтләрен күз карасыдай саклый торган халык. Безнең өчен әбиләребезнең тузанлы сандыклары – гади генә әйберләр салып кую урыны түгел, ә чын хәзинәләр тупланган серле дөнья. Анда сакланган һәр әйбернең үз тарихы, үз җаны бар.

Бүген без шул сандыкларны ачып, йөз елдан артык тарихы булган киндер күлмәкләргә кагылабыз, әбиләребезнең нәфис тәңкәле бизәнү әйберләрен, сырга-алкаларын, балдак-йөзекләрен һәм беләзекләрен кулга алабыз. Бу әйберләрне караганда, күңелгә ниндидер җылылык йөгерә, үткәннәр белән җеп өзелмәгәнен тоясың», – ди Ольга Шупшина.

Бу бит чыннан да зур байлык! Бу – безнең тамырларыбыз, безнең горурлыгыбыз. Әбиләребез калдырган бу мирас безне үз тарихыбызны онытмаска, аны киләчәк буыннарга да шулай саф килеш тапшырырга өнди.