Туганайлар

Редакция

Безнең дус коллектив

ГУБИНА ЮЛИЯ ЮРЬЕВНА

җитәкче - баш редактор

Юлия Юрьевна 2014  елда Казан Федераль университетының экология һәм география факультетын тәмамлап, эколог белгечлеге алган.  2015 елның июленнән “Туганайлар” газетасы редакциясенә корреспондент булып эшли. Нечкә күңеле, хисчән Юлия Губина мәкаләләрне күңелгә үтеп керерлек итеп яза белүе белән газета укучылар игътибарын яулады. Бик кыска вакыт эчендә үзен талантлы журналист итеп танытты. Үзенә тапшырылган эшне җиренә җиткереп, төгәл башкаруы белән коллективта аерылып торды.

2018 елның декабреннән "Туганайлар" редакциясенә җитәкче-баш редактор булып билгеләнде. Редактор буларак, Юлия Юрьевна газетага яңа сулыш өрде. Яңадан-яңа идеяләре белән газетаны һәм электрон сайтны тагын да эчтәлеклерәк итү максатын куя. “Татмедиа” җитәкчелегенең һәрьяклы ярдәме белән, газетаның тиражын арттыру өчен төрле кызыклы конкурслар, бәйгеләр игълан итә. Җиңүчеләргә призлар алу өчен спонсорлар эзләүгә дә аерым игътибар бирә.

Юлия Юрьевна үз кулы астында эшләүчеләргә карата таләпчән дә, ярдәмчел дә. Кеше хәленә һәрчак керә белә, коллективтагы  һәркемгә карата объектив мөнәсәбәттә.

МОРАТОВА ФИРАЯ МУФАЗДАЛОВНА

редактор

Татарстанның атказанган матбугат һәм массакүләм коммуникацияләр хезмәткәре Фирая Муфаздаловна 2019 елның октябреннән, договор нигезендә, “Туганайлар” газетасында эшли башлады, 2021 елның февраленнән  – редакция штатында. Озак еллар дәвамында район газетасында эшләгән. Татар телендә язучы тәҗрибәле журналист. Кирәк чакта һәркемгә ярдәмгә килергә әзер.

СКВОРЦОВА МАРИНА ОЛЕГОВНА

сайт редакторы

Марина Олеговна – 2013-2017 елда Ижевск шәһәрендәге Удмурт дәүләт университетын тәмамлаган, 2017-2019 елда Казан Федераль университетында магистратурада белемен арттырган филолог. “Туганайлар” газетасы редакциясендә 2019 елның январеннан эшли.

Марина Олеговна – керәшеннәр газетасы редакциясе өчен зур табыш. “Туганайлар” сайты, тулысынча, аның җаваплылыгында. Сайтка керәшен дөньясындагы һәм, гомумән, республикадагы, илдәге яңалыкларның, хәбәрләрнең тиешле вакытта куелуы да Марина Олеговна күзәтчелегендә. Шулай ук, айга бер мәртәбә “Туганайлар” газетасының ике полосасы рус телендә Марина Олеговна әзерләгән материаллар белән чыга.

 Хезмәттәшебез архивтагы ландрат кенәгәсе мәгълүматына һәм “ревизская сказка”га, башка материалларга нигезләнеп, керәшен авылларының тарихын фәнни яктан өйрәнә. Үз фикере булган ныклы белемле, артык туры сүзле журналист.

НОВИКОВА МИЛЕНА СЕРГЕЕВНА

корреспондент

Казан Федераль университетының дүртенче курсы студенты Милена Сергеевна “Туганайлар” редакциясендә 2018 елның 1 февраленнән  эшли. “Милена редакциягә мәктәп партасыннан ук күчте”,  дип, үзара шаярткан чакларыбыз да була.

Милена Новикова, башлыча, сайтка материаллар әзерләү, аларны сайтка кую белән шөгыльләнә. Шулай ук, газета саен аның берсеннән-берсе кызыклырак язмалары чыга. Милена авыл, аның кешеләре турында язарга ярата. Катлаулы темаларга да һич икеләнмичә алына.

Милена Сергеевна аңлаешлы гади тел белән яза белә. Тәҗрибәле хезмәттәшләренең киңәшләренә һәрчак колак сала. Тырыш, тыйнак, үзенә кушылганны вакытында башкарырга омтылучы, вакытның кадерен белүче хезмәткәр.

ДМИТРИЕВА ОЛЕСЯ ОЛЕГОВНА

корреспондент

Олеся Олеговна Казан милли тикшеренү технология университетының ул чагындагы икътисад, идарә, хокук һәм социаль сфераны оештыру факультетында белем ала. Социаль хезмәткәр белгечлегенә ия Олеся Олеговна төрле оешмаларда эшләп тәҗрибә туплаган, “Салават күпере” журналында бүлек редакторы булып эшләгән.  2020 елның 26 июненнән “Туганайлар” газетасы  корреспонденты.

Олеся Олеговна – социаль  челтәрләрдәге группалар өчен җаваплы хезмәткәр. “Тик-Ток”ка  ул әзерләгән кызыклы видеолар арасында миллионнарча мәртәбә каралганнары да бар! Олеся Олеговна һәркем белән уртак тел таба алу сәләтенә ия, кешеләрне бер күрүдә үзенә җәлеп итә белә, кызыклы идеяләрне тормышка ашырырга ярата. Катгый чикләүләрне бик үк кабул итеп бетерә алмаучы, бәйсезлекне өстен күрүче,  иҗади фикерләүче хезмәткәр.

САБИРОВА ФИРДАНИЯ ИЛГИЗОВНА

компьютер версткасы буенча дизайнер

Фирдания Илгизовна 2012 елда Казан Федераль университетын филолог-преподователь белгечлеге буенча тәмамлаган. “Ватаным Татарстан”, “Шәһри Казан”, “Мәдәни җомга” кебек республика газеталарында һәм  “Право и жизнь” журналында  эшләп, олы тәҗрибә туплаган.

“Туганайлар” редакциясендә Фирдания Илгизовна 2016 елның сентябрендә офис-менеджер булып эшли башлады, ноябрь аеннан дизайнер-верстальщик вазифасы йөкләнде. Килүгә үк, заманча таләпләрдән чыгып, газетаның  бизәлешенә үзгәрешләр кертүгә игътибар бирде. Профессионалларча осталык һәм табигатьтән бирелгән рәссамнарча тоемлау белән газетаның һәр полосасын тиешенчә бизәп, сыйфаты  бик начар булган фотоларны да фотошоп ярдәмендә оста итеп үзгәртеп куя. Сайт өчен дә плакат-өндәмәләрне үзенчәлекле итеп ясый. Нинди генә эш кушсаң да, җиренә җиткереп үти. Газетаны тагын да баерак эчтәлекле  итү буенча аның тарафыннан кызыклы идеяләр, тәкъдимнәр еш яңгырый.

Җитез, үз хезмәтен ярата, кушканны көтеп тормыйча, үзе белеп эшли. Верстка өлкәсендәге яңалыклар, шулай ук, башка газеталарның бизәлеше, алардагы үзгәрешләр белән даими кызыксынып, барысын да күзәтеп бара.

САБИРОВА ЭНҖЕ РАВИСОВНА

офис-менеджер

Энҗе Рависовна 2012  елда  Казан Федераль университетын бик яхшы билгеләренә генә тәмамлап, туган тел һәм әдәбияты укытучысы белгечле алган. 2014 елның 1 июленнән “Туганайлар” редакциясендә офис-менеджер булып эшли.

Белгечлеге буенча филолог Энҗе бухгалтерлар өчен булган 1С программасын да тиз үзләштерде. Договорлар, актлар, рәсми хатлар, приказлар, финанс һәм подписка мәсьәләсендә оешмалар белән элемтә, типография эше – болар барысы да Энҗе өстендә. Ягымлы, сөйкемле, тырыш һәм ярдәмчел кеше ул.

Үзенең турыдан-туры эшен башкару белән беррәттән, газета өчен текстлар җыярга да, сайтка куяр өчен материаллар әзерләргә дә җитешә.

Үз дәрәҗәсен белүче, төгәллек  яратучы, һәр документны, һәр рәсми кәгазьне  тәртиптә тотучы, үз хезмәтенә кагылышлы һәр яңалыкны көнендә-сәгатендә өйрәнеп баручы Энҗе редакциянең хуҗалык эшенә дә вакыт таба. Коллективта һәр кеше белән аның үз телендә сөйләшә белә. Кирәк чакларда Энҗе Рависовна иҗат эшенә чумган журналистлар өчен "палочка-выручалочка" да, шуңа да колективта хөрмәткә ия.

ШӘРӘФЕТДИНОВ РӨСТӘМ ХӘЛИТОВИЧ

шофер

 

Рөстәм Хәлитович 2020 елның 13 январеннан “Туганайлар” редакциясендә шофер булып эшли. Үз хезмәтен, профессионалларга хас булганча,  җиренә җиткереп башкара. Автомобиль салоны һәрчак чиста, машина төзек, юл йөрү кагыйдәләренә зур игътибар бирә.  Хезмәткәрләргә шимбә һәм якшәмбе көннәрендә редакция эше буенча кая да булса командировкага барырга туры килгәндә, Рөстәм тиешле вакытта һәм берсүзсез юлга кузгала.

Рөстәм Хәлитович – коллективтагы һәркемгә карата игътибарлы, тырыш, сабыр, эчке культурага ия хезмәткәр.

Алар бездә эшләде

БЕЛОУСОВА ЛЮДМИЛА ДАНИЛОВНА

Главный редактор

"Туганайлар" газетасы керәшен дөньясында сәяхәткә чыккан корабны хәтерләтә. Керәшеннәрнең искиткеч бай тарихи мирасын барлый-барлый йөзгәндә, зур-зур дулкыннарны да, биек-биек тауларны да яуларга туры килә. Әмма дә ләкин каты җилләр дә, көчле давыллар да бу корабны куркыта һәм батыра алмый, чөнки редакциядә зур сынаулар үткән тәҗрибәле капитан - Людмила Даниловна эшли. 2008- 2018 елларда Людмила Белоусова "Туганайлар" редакциясенең җитәкчесе-баш редакторы булып эшләде.

Ул күпкырлы талант иясе. Язган язмалары укучыны тирән уйларга салса, җырлаган җырлары күңелләрнең иң тирән кылларын да кузгата. Аның эшчәнлек диапазоны бер редакция белән генә чикләнми, ә керәшеннәрнең иҗтимагый тормышына да барып тоташа. Ул Татарстан Республикасы иҗтимагый керәшен оешмасы Башкарма комитеты җитәкчесе һәм Татарстан халыклары Ассамблеясенең Идарә Советы члены булып тора. Керәшен культурасын, йолаларын һәм традицияләрен саклауга да зур өлеш кертә, керәшен яшьләре арасыннан талантларны барлауга, аларның энергиясен дөрес юнәлештә үстерүгә дә күп хезмәт куя.

Людмила Даниловна - Татарстан, Россия журналистлары берлеге члены.

МУЛЛИНА ИРИНА АЙДАРОВНА

баш редактор урынбасары

Ирина - яшь һәм талантлы белгеч. Коллектив тормышына бик тиз кереп китте һәм аның аерылгысыз өлешенә әйләнде. Тыныч холыклы, күп сөйләшмәс - бу аның кимчелеге түгел, ә өстенлегедер. Искиткеч белемле, теләсә нинди теманы яктыртырга сәләтле. Барлык яңалыкны эләктереп ала белә, гел алга омтыла. Эшенә бик җаваплы карый. Аның яшьләр, студентлар тормышына караган, өлкән буынга багышланган, керәшен йолалары, гореф-гадәтләре турындагы язмаларны үз эченә алган мәкаләләре кызыклы, аларда күтәрелгән проблемалар да заманча. Үзенең иҗатында телнең байлыгыннан, сурәтләү чараларыннан оста файдалана, төрле жанрларда иҗат итә.

МАРТЫНОВА МАРИЯ МИХАЙЛОВНА

Чаллы регионы буенча махсус корреспондент

Мария Михайловна - төзәтеп булмаслык романтик, хыялый кеше. Төннәр утырып ак кәгазьгә шигырь юллары төшерә, матур-матур мәкаләләр яза. Үлчәү йолдызлыгында тугангамы, ул дөньяны тигезләүче булып тора. "Туганайлар"да эшләвем, халкыма багышлап мәкаләләр иҗат итүем чынга ашмаган хыялларымны тутырып, дөньямны тигезләп тора", - ди ул. Ул бик тугры дус, бүгенге дусларының күбесе яшьлектән үк сыналган кешеләр. Дуска да, дошманга да һәрвакыт йөзе ачык. Әнә шундый эчкерсезлеге, кайвакыт беркатлылыгы тормышта кайчак ярдәм итсә, кайчак кыен хәлгә дә куя. Кешеләрдән ул ихласлылык көтә. Дөреслек эзләүдән әле өметен өзмәгән.

 ИВАНОВА ЕВДОКИЯ ФЕДОРОВНА

җаваплы секретарь

Евдокия Федоровна - ачык йөзле, шат күңелле кеше. Коллективта аңа яратып, Дуся диеп эндәшәләр. Дуся - Казан дәүләт университетының филология факультетын тәмамлый, татар теле белгече. Газетада эшләү өлкәсендә тәҗрибәсе зур, югары белемле специалист. Ул "Туганайлар" газетасына республикабызның иң өлкән матбугаты - "Ватаным Татарстан"нан килде. Евдокия бик җаваплы хезмәткәр, үз эшен белеп, яратып, югары дәрәҗәдә башкара. Редакция кунаклары белән уртак сүзне тиз таба. Үзенең кояштай көләчлелеге белән коллективны позитив эшкә илһамландырып тота.

ВАРАКСИНА НИНА НИКОЛАЕВНА

корреспондент

Нина "Туганайлар" редакциясенә 2017 елның февраль аенда килде. Моңа кадәр дә иҗат дөньясында кайнавы, үзебезнең керәшен газетасында эшлисе килү теләге аны монда алып килә дә инде. Нина башкалар язган роман-хикәяләрне укып кына калмый, үзе дә шигырьләр, хикәяләр яза. КФУ ның татар филологиясе бүлеген тәмамлаган.

ХУСАИНОВА ТӘСКИРӘ СОЛТАНОВНА

компьютер версткасы буенча оператор

Тәскирә Солтановна - аралашучан, киң күңелле, эшчән кеше. Кулы эшкә тисә, таулар күчерә. Компьютер тычканының хәрәкәтләнүенә, клавиатура буйлап бармакларының йөгереп торуына күз иярми. Баш җитмәслек программалар белән фотолардагы кешеләрне матурлый, яшәртә, утырта, бастыра, борып куя... Гәҗитебезнең матурлыгы, төзелеше аның фантазиясенә бәйле. Эстетик сиземләве көчле. Заман белән бергә атлау өчен, үз өстендә дә күп эшли. Бакчасында матур-матур чәчәкләр, мул уңыш үстерә. Коллегаларын җәй буе бакчасында үстергән җимешләре белән сыйлый. Аның өстенә, ул әле югары квалификацияле тәрҗемәче дә. "Ватаным Татарстан" газетасында эшләп туплаган зур тәҗрибәсе, аны үз эшенең остасы иткән.

 

ТОКРАНОВА НАДЕЖДА ВИКТОРОВНА

корреспондент

 Надя редакциябезнең иң яшь хезмәткәре. Ачык йөзле, аралашучан, сүз артыннан кесәгә керми торган журналист. Үз эшен яратып, тырышып, җиренә җиткереп башкара, аннан тәм таба белә. Мәкаләләрендә кызыклы, актуаль темаларны яктыртырга тырыша, керәшен халкының гореф-гадәтләрен бик яхшы белә. Шигырьләр яза. Шул ук вакытта ул җырга-моңга гашыйк кеше. Күп кенә заманча җырлар авторы. Бүгенге көндә ире белән кыз һәм малай үстерәләр.

ГАБДРАХМАНОВА АЛСИНӘ ДАМИРОВНА

офис-менеджер

Алсинәнең сабырлыгына, тыйнаклыгына сокланып туя алмыйбыз. Көн туды исә тавык та чүпләп бетерә алмаслык кәгазь эшләрен һич ялыкмый тәртипкә салып куя. Компьютер белән дә бик оста эш итә. Һәр эшне төгәл, пөхтә итеп башкара, һәр документ үз урынында, үз тәртибе белән куелган.

Кечене кече, олыны олы итә белүче ярдәмчел кеше ул. Үзеннән кече сеңлесенә үрнәк алырлык олы апа да. КФУны тәмамлап, диплом яклады.

БИКЧӘНТӘЕВ РӨСТӘМ КАМИЛЕВИЧ

машина йөртүче

Рөстәмнең ишетми калган, белмәгән әйберсе юктыр. Журналистлардан бер дә ким түгел һәр яңалыкны эләктереп кенә ала. Аннан бөтен яңалыкны белешеп торырга була. Аларны ул сөйләп кенә калмый, һәр ситуациягә үзенең фикерен дә җиткерә. Эше буенча да бик оста ул. Машинасы гел гөлт итеп эшләп тора. Барасы җиреңә дә җилдертеп кенә алып барып килә. Ерак юлларга да аның белән бер шикләнми чыгып китәбез. Ярдәмчел, ышанычлы иптәш тә ул.

 

 

Керәшен дөньясындагы яңалыкларны ВКонтакте, Инстаграм, Телеграм-каналда карап барыгыз. 

Хәбәрләрегезне 89172509795 номерына "Ватсап" аша языгыз.

Telegram-канале
Подробнее: http://tuganaylar.ru/news/novosti/aybagyru-byt
Telegram-канале
Подробнее: http://tuganaylar.ru/news/novosti/aybagyru-bytсоциаль челтәрләрендәге группалардан укып, белеп барыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: