Иң шәп бүләкнең берсе Владимир авылына китте

Шушы елның икенче яртыеллыгына «Туганайлар» газетасына язылган кешеләрдән 70е приз уйнатуда катнашты. Алар – газетага язылу квитанциясе күчермәсен редакциягә җибәрүчеләр. Бу юлы 7 бүләк уйнатылды. Уен 7 июльдә «Туганайлар»ның ВКонтактедагы төркемендә туры эфирда, газетаның баш редакторы Юлия Губина җитәкчелегендә уздырылды. Бүләкләре дә шәп иде: үтүк, таба, фен, чәй сервизы, духовка өчен пыяла таба, плед.  Духовка өчен пыяла табага Мамадыш районының Владимир авылыннан Любовь Степанова ия булган иде. 

«Туганайлар»га озак еллардан бирле язылам. Газета керәше дөньясындагы яңалыкларны яктыртып, безне таныштырып бара. Рәхмәт, сезгә, туганайлылар! Авыр эшегездә уңышлар, илһам, язылучыларыгыз артуын телим», – дип үз теләкләрен җиткерде Любовь Степанова.

Казанда яки авыл җирендә яшисезме, Красноярскида яки Чиләбе ягындамы, карендәшләр, онытмагыз, сезнең барыгызны да «Туганайлар» редакциясе газета аша очраштыра, аралаштыра. Гел шулай бергә булыйк. Бер гаиләдәй бердәм булсаң, тормышлар да күңеллерәк бит...