Галина Казанцева керәшенем дип җан атып яши

5 яшьтә үк җырлый башлый

Казанцева Галина Александровна 1953 елның 12 ноябрендә Тукай районы Маҗын авылында дөньяга килә. Әтисе Александр Казанцев авылның иң яхшы комбайнеры була. Ул кечкенә Галинаны бер эштән дә курыкмаска, нык булырга өйрәтә. Әнисе исә керәшен җыруларына мәхәббәт уята. Галина Александровна 5 яшьтән җырлый башлый. 

10 сыйныфны бетергәндә үзенең тормышын җыр белән бәйләргә карар кыла һәм Әлмәт музыка училещесына юл тота. 1969-1973 елларда Әлмәт шәһәренең ТАССР Әлмәт музыка училищесында белем ала. Чыгарылыш имтиханнарына Казан дәүләт консерваториясеннән госкомиссия килә һәм барлык студентлар арасыннан нәкъ Галина Александровнага әлеге уку йортына укырга керү өчен юллама тапшыралар.

1973-1978 елларда Казан дәүләт консерваториясендә белем ала. 1978 елның 15 апрелендә Муса Җәлил исемендәге Татар дәүләт академия опера һәм балет театры солисты итеп билгеләнә.

Опера театрында бу керәшен кызының иң беренче роле — Н.Җиһановның «Алтынчәч» операсындагы төп героиня Алтынчәч. Алтынчәч ариясе белән үк тамашачы күңелен яулаган керәшен кызы Галина театрда төп рольләр башкара: «Кармен»да — Микаэла, «Богема»да — Мюзетта, «Башмагым»да — Сәрвәр, «Наемщик»та — Гөлйөзем, «Кара йөзләр»дә — Галимә, «Баядера»да — Мариетта. Ике дистә ел бу театрда эшләгәндә аның оперетталардагы рольләре дә шактый күп була. Салих Сәйдәшевкә багышлап Казан телестудиясе төшергән телевизион спектакльдә композиторның сөйгәне Гөләндәмне уйный.

Керәшеннәрнең онытылып барган җыруларын саклап калуны максат итеп куя

20 ел дәвамында Галина Казанцева М.Җәлил исемендәге Татар дәүләт академия опера һәм балет театры солисткасы булды. Үткән гасыр азагында республика керәшен этнографик мәдәни-агарту берләшмәсе төзелгәч, Галина Александровна аның советына сайлана. Ул керәшеннәрнең гасырлардан килгән фольклор культурасын үстерү өчен җаваплы итеп билгеләнә. Югары сәхнә культурасына, олы тәҗрибәгә ия җырчы керәшеннәрнең онытылып барган җыруларын, биюләрен, йолаларын саклап калуны максат итеп куя.

1990 елларда «Айбагыр» халык фольклор ансамбле оеша. Галина Александровна Казанцева ансамбльнең алыштыргысыз җитәкчесе.

— «Айбагыр» — безнең заманада мөмкин булган кадәренчә, керәшен культурасын күрсәтә торган коллектив. Бүгенге көндә ансамбль чын керәшенчә бормалар һәм керәшеннең үз сөйләме белән, югары дәрәҗәдә өйрәнгән җырларны башкара, йолаларга нигезләнгән фольклор спектакльләр куя. Соңгы елларда керәшен яшьләре сәхнәгә күп чыга башлады.

Моңа республикакүләм бәйрәмнәр, шул ук Җөридәге Питраулар зур йогынты ясый. Бай культурабызга карата башка халыкларда уңай фикер тудыруда, үзара дуслыкны ныгытуда алар зур әһәмияткә ия. Керәшен җыруының тамырлары тирән, җырлаганда ул күкләргә менгәндәй тоела, — дип җиткерде җырчы Галина Казанцева. 2000 елның 25 декабрендә Галина Александровна Казанцевага Татарстан Республикасының Халык артисткасы исеме бирелә.

Фото: «Туганайлар»