Яңа Усыдан Юмагуловлар гаиләсе хезмәт сөеп яши

Өч дистә елдан артык бергә яшәп, алар ике бала тәрбияләп үстергәннәр, бүген исә инде оныкларының шатлыгына куанып яшиләр. Юмагуловлар гаиләсе – авылның үрнәк кешеләре. Аларның нигезе һәрвакыт җылы, өйләрендә – иминлек.

Гаилә бәхетенең сере нәрсәдә соң? Надежда һәм Эдуард моны бик гади аңлаталар:

— Гаилә нык булсын дисәң, иң беренче чиратта – мәхәббәт, аннары бер-береңне сүзсез аңлау һәм ишетә белү мөһим. Тормыш юлы һәрвакыт шома гына бармый, авыр чакларда да бер-береңә терәк булып калырга кирәк. Ә иң мөһиме – гаилә традицияләрен саклап, олыларга хөрмәт, кечеләргә мәрхәмәтле булырга өйрәтү, – ди алар.

 

Юмагуловлар – бик тырыш. Аларның ишегалды тулы мал: сыерлар, бозаулар, бакчаларында исә – күз явын алырлык чәчәкләр һәм мул уңыш. Мәктәп директоры булып эшләүче Надежда Михайловна, эш арасында бакчачылык белән дә шөгыльләнергә өлгерә. Ә уллары һәрвакыт аның янәшәсендә. Быел ул яңа сортлы кабачкилар утыртып караган.

— Ун төп кенә утырткан идем, уңышы искиткеч булды! Дөрес тәрбияләп, вакытында су сипкәч, табигать тә үзенең юмартлыгын кызганмады, – дип елмая хуҗабикә.

Юмагуловларның бу матур тормыш юлы – яшь гаиләләр өчен дә зур үрнәк. Бер-береңне хөрмәт итеп, хезмәт сөеп яшәгәндә генә гаилә учагының җылысы сүнми икән.

Фотолар: Н. Юмагулова.