Чистайдан 99 яшьлек Мария Катаева озын гомернең сере – якыннарының кайгыртуында ди

Аны шәһәр башлыгы урынбасары Михаил Ксенофонтов шәхсән котлады. Ул Мария Павловнага чәчәкләр, истәлекле бүләк һәм җылы теләкләр белән котлау открыткалары тапшырды.

Мария Павловнаның язмышы – ул чор елъязмасы. Ул Биләр районының Югары Кондрата авылында туа. Бөек Ватан сугышының кырыс елларында, аңа нибары 14 яшь булганда, ябык хәрби заводта станок янына баса, комплектлаучы булып эшли.

«Сменалар 12 сәгать дәвам итте – иртәнге 8 дән кичке 8 гә кадәр, ялларсыз. Салкын баракларда яшәдек, мичкә ягарга бернәрсә дә юк иде, шуңа күрә ничек тә булса җылыныр өчен станок янында ук йокларга туры килде», – дип искә ала ул авыр елларны.

Җиңү көненнән соң Мария Павловна, кияүгә чыгып, туган авылы Югары Кондратага күченә. Ә 1954 елдан, пенсиягә чыкканчы, сәгать заводында пешекче булып эшли, эшчеләрне тәмле һәм туклыклы ризык белән туендыра.

Бүген юбилярның гаиләсе зур һәм тату: өч баласы, өч оныгы һәм биш оныкчыгы бар. Мария Павловна үзенең озын гомерле булуының сере итеп кызының кайгыртуын һәм яхшы тәрбия бирүен саный. Хәтта олы яшьтә дә ул җирсез тормышны күз алдына китерә алмый – әлегә кадәр яратып бакчада эшли һәм яшелчәләр үстерә.

Котлауларга җавап итеп, Мария Павловна барлык чистайлыларга үзенең изге теләкләрен җиткерде: ныклы сәламәтлек һәм тыныч күк йөзе теләде.

Фото: Чистай хәбәрләре