Торак-коммуналь хуҗалык тармагында зур ремонт көтелә

Торак-коммуналь хуҗалык тармагына ил казнасыннан ун елда барлыгы 4,5 триллион сум акча бирү күздә тотыла.

Билгеле булганча, әле узган елның декабрендә (чираттан тыш!) торак-коммунальхезмәтләр өчен түләүне арттырганнар иде. Тарифларны декабрьдәге чираттан тыш арттыру ил күләмендә коммуналь челтәрләрнең тузуына бәйле. Мәскәү шәһәре Витте исемендәге университетының шәһәр хуҗалыгы икътисады һәм хезмәт күрсәтү тармагы кафедрасы доценты Кирилл Парфенов әйтүенчә, илебездәге барлык коммуналь челтәрләрнең 70 процентка якыны тузган. Аеруча, магистраль җылылык үткәргечләре, су тәэминаты системасына бәйле проблемаларны хәл итәргә кирәк. Совет чорыннан соңгы вакытта бу тармак структурасында гел реформалар уздырылып килде, ә коммуналь челтәрләрне яңартуга аз игътибар ителде, дигән фикер белдергән Волгоградның элекке мэры Олег Капустин да.