Казанда Григорий Родионов исемендәге беренче фәнни-тикшеренү конференциясе уздырылды

“Идел буе халыкларының тарихи һәм мәдәни-әхлакый кыйммәтләре”нә багышланган бу конференцияне Казан шәһәре башкарма комитетының мәгариф идарәсе, Татарстан халыкларының Дуслык йорты, Казан шәһәренең  керәшен җәмгыяте оештырган.

Эшне җиде секциядә алып барган конференциядә республика башкаласы белән беррәттән, Лениногорск, Биектау, Арча, Әлки, Азнакай, Питрәч, Зеленодольск, Балтач районнары һәм Дербышка поселогы мәктәпләре укытучылары, балалар бакчалары тәрбиячеләре катнашкан. Ул секцияләрдә Григорий Родионов туып-үскән җирлектәге көнкүреш үзенчәлекләренең, сөйләм теленең, җыр-көйләрнең тарихи сакланышын өйрәнгәннәр. Аның иҗатында борынгы төрки тел үзенчәлекләренең кулланылышына да игътибар иткәннәр. Шагыйрьнең әсәрләрен сәнгатьле уку белән бергә, аның үрнәгендә парчалар, хикәяләр, шигырьләр дә иҗат иткәннәр.

Бу конференциянең  йомгаклау тантанасы 31 мартта Татарстан Халыкларының Дуслык йортында уздырылды. Анда республикабызның күп кенә танылган шәхесләре катнашып, үз чыгышларында, шагыйрь Гәрәй Рәхим иҗатына һәм бу фәнни-тикшеренү конференциясенә зур бәя бирделәр.

Соңыннан призлы урыннарны алган укытучыларга конференция азагында дипломнар тапшырылды.