Редакциябезгә халыкның яраткан җырчысы, шагыйрь Георгий Ибушев килде.
Георгий Ибушев бу җәйне дә үзенең туган авылы Владимирда, төп нигезендә уздырды. Туган авылы болыннарыннан, басу-кырларыннан, чишмәләреннән һәм, хәтта, бәрәңге бакчасыннан да күңеленә илһам җыйгандыр ул... Авылда, хис-тойгылар дөньясында үткәргән көннәре Георгийның күңеленнән шигъри сүз булып тамар әле. Аның көзге яңгырлы кичләрдә, ак буранлы кышларда язылган шигырьләрен безнең «Туганайлар»ны укучылар һәм, гомумән, поэзия яратучы һәркем көтеп ала.
Ә хәзер Георгий Ибушевның шушы арада язган бер шигырен «Туганайлар» сайтына күз салучыларга, ВКонтактедагы яңалыкларыбызны карап баручыларга да җиткерәбез.
Сукмакларда – синең эзләрең
Әйләнәм дә карыйм үткәннәргә,
Сукмакларда – синең эзләрең.
Күз алдымнан китми мөлдер-мөлдер
Сагыш тулы моңсу күзләрең.
Кайтып киләм. Онытылган сукмак, –
Ничә еллар синнән узмадым.
Күкчәчәкләр үскән чит-читенә,
Искә төштең, сине уйладым.
Бу гомернең шундый чаклары бар,
Инде бәхет якын дигәндә,
Әйләндереп, ул ыргыта сине,
Бар да юкка чыга бермәлдә.
Күкчәчәкле сукмак кыңгыраулы,
Кыңгыраулар чыңы – тургайда.
Кычкырасым килә: “Күкчәчәктәй
Зәңгәр күзле дустым, син кайда?”.
Нет комментариев