Алиса Аглеева: "Керәшен хәрәкәтенә үсәргә һәм алга барырга булышам!"

Җөри авылы янында үткәрелгән "Питрау-2022" фестивалендә дәүләт һәм ведомство бүләкләрен тапшыру тантанасы узды. Мамадыш районы мәдәният йорты методисты, республика керәшен иҗтимагый оешмасы члены Алиса Аглиева Татарстан мәдәният министрлыгының “Мәдәнияттәге казанышлары өчен” күкрәк билгесе белән бүләкләнде.

"Татарстан республикасы керәшеннәренең иҗтимагый оешмасына чын күңелдән рәхмәт әйтәм! Һәрвакыт "идея" дип яшим, гел керәшен проектлары белән кызыксынам. Гади яшьләр өчен үткәрелгән чаралардан башлап, "Кряшен чибяре" кебек зур конкурсларны оештыруда катнаштым. Шулак ук, 10 ел дәвамында эшен башкарган "Айбагыр" этник лагеры, керәшен яшьләре өчен үткәрелгән форумнар, җыелышлар һәм бик күп башка проектларда үз өлешемне кертергә тырышам. Туган ягыма кайтып китсәм дә, керәшен хәрәкәтенә үсәргә һәм алга барырга булышам!" – ди Алиса Аглеева.