Урта Багражда хәрбиләрнең әниләрен зурлаганнар

Урта Баграж мәдәният йортында Аналар көне уңаеннан узган бәйрәмгә уллары махсус хәрби операциядә катнашучы әниләр дә кунак итеп чакырылган иде. Кичәне Баграж авыл җирлеге башлыгы Павел Минеев ачып, залдагы барлык әниләрне Аналар көне белән тәбрикләгән, район мәдәният йорты каршында эшләүче «Сөмбелә» ансамбле, Андрей Кузьмин матур җырлар бүләк иткәннәр, дип хәбәр итә "Зәй офыклары"

Кичәнең төп геройлары — Лидия Кузьмина, Татьяна Егорова, Римма Боярова — олы йөрәкле, сабыр әниләр. Һәрберсенең язмышы үзенчәлекле, һәркайсы баласы өчен ут йотып яши. Аларны котлаганда да күзләрен яшь пәрдәсе каплады.
Бәйрәмнән соң әниләр чәй табыны артында аралашып, илләребезнең тыныч булуын, киткән балаларның исән-сау кайтуларын теләделәр.