22 июнь – Хәтер һәм кайгы көне

Төгәл 82 ел элек, 1941 елның 22 июнендә Бөек Ватан сугышы башлануын искә алып, елның-елында, Хәтер һәм кайгы көне уздырыла. Бөтен Россия буйлап «Хәтер шәме» акциясе оештырыла — Бөек Җиңү хакына гомерләрен биргән батыр ир-егетләр, өсләренә солдат шинеле кигән курку белмәс хатын-кызлар истәлегенә шәмнәр кабына. 

Тукай районының — Мәләкәс, Кайбыч районының — Хуҗа Хәсән, Зәй районының — Сарсаз Баграж, Югары Баграж, Мамадыш районының — Чия башы (Никифоровва), Менделеевск районының Монай авылларында яшәүчеләр бу акциядә бик теләп катнаштылар. Мәктәп укучылары һәм укытучылары, авыл мәдәният йорты хезмәткәрләре утлы фронт юллары аша узган авылдашлары истәлегенә салынган һәйкәлләр янына килделәр. Һәм Хәтер шәмнәре кабызып, ил тарихында зур урын алып торган 22 июнь көнен искә алдылар.