Хезмәттәшебез Фирдания Сабировадан алма кагы рецепты

Телеңне йотарлык как ясау өчен, алмаларны кабыгыннан чистартып үзәген алганнан соң, кәстрүл төбенә ярты стакан су салып, салмак утка пешерергә куясың. Кайнап чыккач, тәменә карап бераз гына шикәр яки бал өстәп, тагын биш минут кайнатасың. Пешкән алманы блендер белән издереп пюре ясыйсың. 

Су салынган кәстрүлне газга кайнатырга куясың, аның өстенә пар чыкмаслык итеп таба (таба кәстрүл авызына кереп торырлык булсын) утыртасың. Су кайнап чыккач, табаны майлап, әзерләнгән алма пюресын юка гына итеп җәясең.

Су салмак утта кайнап утырганлыктан, таба кыза һәм как кибә. Какның кибү вакыты — 40 минут тирәсе. Кырыен пычак очы белән куптарып карыйсың, җиңел куба икән, димәк, как әзер. Акрын гына куптарып аласың һәм целлофан пакетка төреп куясың. Бик йомшак, тәмле, сусыл как килеп чыга. Тәмле дә була, ясау өчен күп вакытны да алмый.