Тәрбит, Сәвәләй, Югары Баграж авыллары «Үзебезнекеләрне ташламыйбыз» акциясенә актив кушыла

Кайбыч районының Иске Тәрбит авылы мәдәният йортында махсус хәрби операциядәге егетләргә өй токмачы кискәннәр.

«Барлык авыл хатын-кызлары да катнашты, күп итеп өй токмачы кисеп җибәрдек. Без үз хезмәтебезгә бөтен күңел җылысын, кайгыртучанлыкны һәм игелекле хисләрне салдык»,– дип сөйләде Иске Тәрбит авылының мәдәният йорты җитәкчесе Любовь Тимофеева.

Зәйнең Сәвәләй авылы мәдәният йортында да махсус хәрби операциядә булган егетләребезгә токмач кисү дәвәм итә.  

«Авылдаш хатын-кызларыбыз күңел җылысын биреп, бик теләп башкара бу эшне»,— диде мәдәният йорты хезмәткәре Ләйлә Сабаева.

Шушы ук районның Югары Баграж авылы мәдәният йортыннан да:

«Авылыбызнын сетка үрүчеләре өчен бүгенге көн истәлекле булды. 50нче сетка үрелде. Кыска гына вакыт өчен бу бик зур хезмәт. Үзебездән егетләребез өчен кечкенә генә булса да ярдәм кертә алуыбызга сөенәбез. Бар теләгебез шул: дөньялар тынычлансын, егетләребез исән-сау кайтсыннар»,– диделәр.