«Мәлкәнәй» фольклор ансамбле республикакүләм этномәдәни фестивальдә керәшен җырларына попурри башкарган

Республикакүләм этномәдәни конкурсының зона туры Сарман районында үткәрелгән. 

“Бу бәйгедә барлыгы алты районнан җыелган коллективлар арасында, Минзәлә районыннан без, бердәнбер керәшен ансамбле идек. Без әле беренче тапкыр гына биредә булу бәхетенә ирештек. Бик күп чыгыш ясаучылар булды, кайбер районнардан унлап номер күрсәттеләр. Бик күңелле, матур бәйрәм булды бу. Бер-беребезнең чыгышларын карап, үзебез өчен күп ачышлар ясадык. Монда республикабызда яшәүче төрле милләтләрнең җыр-биюләрен күрә, тыңлый алдык. Мөслим районының Михайловка авылында гомер итүче көньяк кешесенең чыгышы да ошады.

Без керәшен җыруларына попурри җырладык. Әлегә беркемгә дә таныш булмаган, үз ягыбыз җыруын җырларга уйлаган идек, бу планыбыз барып чыкмады, бер солистыбыз авырап китте. Шулай да, зур канәгатьлек белән кайттык Сарманнан. Зона турында катнашу безнең өчен әһәмиятле булды дип уйлыйбыз”, – дип сөйләде Яңа Мәлкән авылы клубы җитәкчесе Светлана Упаева.

Фестивальнең зона турында чыгыш ясаган һәр районга чәк-чәк һәм диплом тапшырылган. 

Светлана Упаева, Гөлназ Сизова фотолары