Кырбаштан Елена Филиппова Рәхмәт хатына лаек булды

“Эшчәнлегегез дәверендә сез, дәүләт һәм җәмгыять өчен бик кирәкле булган социаль хезмәт күрсәтү һәм халыкны социаль яклау өлкәсендә белемле һәм җаваплы белгеч булуыгызны расладыгыз. Чын күңелдән бәхет, нык сәламәтлек һәм иминлек телим!», –  диелгән Татарстанның хезмәт, мәшгульлек һәм социаль яклау министры Эльмира Зарипова имзасы куелган хатта.

Елена Филиппова инде алты елдан артык Саба районының Югары Утар балалар йортында эшли. Үзе Кырбаш авылында яши. Аның турында җитәкчеләре һәм хезмәттәшләре игелекле һәм ярдәмчел кеше диләр.

Бу югары бәя Елена Маратовнаның һөнәри эшчәнлеген генә түгел, ә аның кешелек сыйфатларын да күрсәтә. Балалар йортында эшләү – зур җаваплылык һәм күп көч таләп итә торган хезмәт. Елена Филиппованың балаларга булган игътибары, һәрберсенең язмышы өчен тирән борчылуы, аның эчкерсезлеге һәм кешелеклелеге турында сөйли.