Ураза ашлары: гөмбәле бәрәңге

Кирәк булачак: бәрәңге (1 кило), он (50 грамм), гөмбә (500 грамм), башлы суган (2 данә), яшел суган (100 грамм), зәйтүн җимеше (100 грамм), үсемлек мае.

Бәрәңгене кабыгыннан әрчеп, тозлы суда пешерәбез, яхшылап төябез. Он сибеп, тагын бер кат болгатабыз. Гөмбәне һәм суганны турап, барысын бергә майда кыздырабыз. Шул катнашмага вак итеп туралган зәйтүн җимеше һәм яшел суган салып болгатабыз. Марля кисәген салкын суда чылатып сыгабыз, яшелчә турый торган тактага тигезләп җәябез. Марля уртасына бәрәңге боткасы салып, пирожки камыры шикелле җәеп, уртасына бер чәй калагы гөмбәле эчлек салабыз. Марляның чит-читен күтәреп, бәрәңге сыман итеп төрәбез, марлясыннан алып, онда әвәлибез һәм үсемлек маенда 5-10 минут кыздырабыз.