Владислав ТИМОФЕЕВ: “Әфган куркыныч төштәй искә төшә”

Кайбыч районының Иске Тәрбит авылында 1969 елның январенда туган Владислав Тимофеев та яшь гомеренең ике елын авыр хәрби хезмәттә уздырган. Хәзерге вакытта ул гаиләсе белән туган авылларында яши. Хатыны Надя белеме буенча медицина хезмәткәре, алар бергәләшеп, инде 90яшен тутырган, урын өстендәге әниләрен карыйлар. Авылда тәртип ягыннан да, уңганлык буенча да һәркемгә үрнәк булырлык бу гаилә. Өч бала – Вадим, Руслан, Лилиананы тәрбияләп үстергәннәр.

Владислав Альбертович күп еллар колхозда эшләгән, бүгенге көндә М12 юл төзелешендә – шофёр. “1979-1989 елларда Әфганстанда совет гаскәрләренең чикләнгән контингенты булган хәрби сленгта безне – махсус автомобиль йөртүчеләрне “наливниклар” дип атый иделәр.

Камаз машиналары белән керосин ташыдык. Безгә авырлыкларны күп күрергә туры килде. Бергә булган хезмәттәшләрем белән аралашып торабыз, ул вакытларны куркыныч бер төш кебек искә төшерәбез, хәлләребезне белешәбез, арабыздан киткәннәрне сагынып искә алабыз. Ватанны сакларга әзер тору – ул егетләрнең бурычы, тик мондый афәтләр беркем йортына да кагылмасын, дөньялар тыныч булсын иде”, – диде аз сүзле, җитди, батыр йөрәкле Тәрбит егете.