Туңылҗаның чиләк салу йоласы

Бу хакта 1999 ел азагында «Керәшен сүзе» газетасына Кадер авылыннан 60 яшьлек Елизавета Харитонова язып җибәргән. Ул газетаның 30 декабрь санында басылып чыккан.

Елизавета түти үзенең теләген дә җиткергән: «Хәзер бу җыруларны белгән кешеләр китә бара. Яшьләргә калсын иде алар. Истә калган ике җыруны язып җибәрәм».

Ауаларда шәмнәр җанадыр,
Тармак-тармак мае тамадыр.
Нишләп утырасың, бай баласы,
Башларыңа дәүләт җауадыр.

И, очыгыз, казлар, очыгыз,
Безнең басуларга төшегез.
Безнең басуыбыз шау бодай,
Минем ышанганым бер Ходай.