Шигырьләр иҗат итүче Анастасия Усачева Каенлы авылында әдәби очрашуда катнашты

Анда Татарстан Республикасы журналистлар берлеге, “Кама таңнары” әдәби берләшмәсе члены, тәрҗемәче, эзтабар язучы Нурулла Гаптуллин, үз вакытында территориаль иҗтимагый үзидарә советы рәисе 42 ел укытучы, “Энҗе бөртекләре” балалар ансамбле җитәкчесе, “Сүрәкә” ансамбленең җырчы-солисты, әби, 8 китап авторы, композитор, рәсемнәре белән күзне иркәләүче, тегүче, бәйләү остасы Анастасия Усачева, шәһәр мәгарифе ветераннары советы рәисе урынбасары, ике китап авторы Рушания Габбасова катнашты. Һәрберсенең иҗаты үзенчәлекле, кабатланмас.

“Авыл халкының җылы, ягымлы карашлары дулкынында очрашу башланып китте. Тамашачы ”Кама таңнары” әдәби берләшмә язучыларының шифалы шигъри тамчылар җылысында яшьлек таңнарына кайтып моңланды, балачакның керсез саф чакларын искә төшереп, күзләрен дымландырды, газиз әти-әниләребезнең киңәшләрен янәдән ишетеп, хатирәләр кочагына чумды, табигатьнең гүзәл серле аланнарында хозурланып, күңелен матурлык белән тулыландырды”, – дип хәбәр итә Түбән Камадан “Туган як” газетасы.