Сарсаз-Багражда «Артык гомер» драмасы сәхнәләштерелде

Сарсаз-Баграж мәдәният хезмәткәрләре дә фестивальгә кушылып, Хәбир Ибраһимның «Артык гомер» драмасын сәхнәләштереп күрсәттеләр.

«Спектакль, анда катнашучы үзешчәннәр уены уңышлы килеп чыкты. Сәхнәдә иң актуаль темалар — гаилә, тәрбия, әхлак темалары күтәрелеп, тамашачы хөкеменә тапшырыла. Гади генә декорация фонында катлаулы вакыйгалар, күренешләр бер-бер артлы эмоциональ рәвештә үрелеп бара», — ди спектакльне караучылар.

«Артык гомер» драмасында әби белән бабайның язмышы сурәтләнә. Иң үкенече — аларның балалары булмый. Бабай вафат булгач туганнар бергә җыелыша. Менә шул вакытта туганнар арасындагы бердәмлек, батырлык күренә дә инде. Ялгыз калган, урын өстендә ятучы, авыру әбине тәрбияләүне Сабир гаиләсе үз өстенә ала.

Спектакльдә уйнаучы 10 үзешчән артистның уеннары искиткеч! Рольләрне Николай Григорьев (Ярулла), Галина Белголова (Мәүлия), Алексей Герасимов (Сабир), Мария Журавлева (Сәрия), Марина Халикова (Регина), Алексей Краснов (Тәүфыйк), Людмила Чернова (Халисә), Эдуард Белголов (Әмир), Михаил Минеев (Хәйбулла), Роза Герасимова (күрше хатыны) зур осталык белән башкарды. Клара Фролова артистларга булышучы, ярдәм итүче булды.

Чыганак