Менделеевск шәһәренең “Туганайлар” коллективы Сочидагы фестивальдә җиңү яулады

Конкурста Россиянең төрле төбәкләреннән, Мәскәү, Ковров, Ногинск, Ярославль, Сызрань, Иркутск, Когалым, Зеленоград, Сочи, Липецк, Воронеж, Тула, Волжский шәһәрләреннән җыелган иҗат коллективлары чыгыш ясаган. Сәхнәгә керәшен милли киеменнән “Туганайлар” коллективы чыккач, фестивальдә катнашучылар гына түгел, профессионаллардан торган жюри да гаҗәпкә калган.

“Туганайлар” коллективы Лазаревск шәһәренең милли мәдәниятләр үзәгендә булып, Сочида яшәүче барлык милләтләрнең культура үзенчәлекләре белән танышкан. Үзләре дә мастер-класс күрсәткәннәр. Хуҗалар Татарстаннан алып барган чәкчәкне дә, керәшен җыруларын да яратканнар.

Шулай ук, Сочи шәһәрендәге  татар һәм башкорт җәмгыяте чакыруы буенча, “Золотой колос” санаториенда хәйрия концерты куйганнар. “Туганайлар”ларга кушылып, тамашачы да керәшенчә биегән, җырлаган.

Безнекеләр фестиваль көннәрендә бер кочак дипломга, Рәхмәт хатларына лаек булганнар. Соңыннан, “Туганайлар” колективы җитәкчесе Ясминур Гыйззәтуллина янына килеп, “моңа кадәр керәшеннәр турында бернәрсә дә белмәгәнбез икән”, дип әйтүчеләр дә аз булмаган. Сочи шәһәренең татар автономиясеннән журналист Зөлфия Хәким үзләрендәге “Сәфәр” газетасына “Туганайлар” турында аерым язма да хәзерләгән.