"Бәрмәнчек"ләрнең концертында атмосфера башка

Югары Баграж авылы Сарман районы чикләренә терәлеп торганга, Петровка Заводы авылы әллә ни ерак түгел, бары 12 чакрым гына, туры асфальт юлдан 8-10 минутлык юл. Ял көненә Чаллыдан авылга кайткач, рәхәтләнеп ял итеп концерт карап кайтуы әллә ни авыр булмады, дип хәбәр итә  Чаллыдан Михаил Тукранов. “Бәрмәнчек” Дәүләт фольклор ансамбле чыгышларын күп мәртәбәләр күрергә туры килсә дә, концертларына гел барасы килеп тора. Ни өчен дигәндә, беренчедән - үзебезнекеләр, икенчедән - яшь, көчле энергияле коллектив. Концерт номерлары бер-берсенә бәйләнеп, күп тавышлы җырлар, дәртле биюләр белән алышынып бара. Репертуарларына керәшен, татар, рус җырлары, биюләре кертелгән. Ансамбль профессионал артистлар белән тупланган. "Бәрмәнчек"ләрнең концертында атмосфера башка.
“Бәрмәнчек” Дәүләт фольклор ансамбле Бөтенроссия “Интерфолк” конкурсында һәм халык-ара “Алтын мәйдан” конкурсларында лауреат исеменә лаек булган, халык-ара “Дунай фест” (Босния - Герцеговена) һәм “Боекчекмедже” (Турция) конкурсларында дипломант дәрәҗәсен алган коллектив. Концерт күңелле узды, истәлеккә фотолар карыйк.