“Җапрак” бәйрәменең яфрагы да шифалы

— Бәйрәм көнендә яшьләр болыннарга чыгып, урманнарга менеп, уйнап-җырлап таң каршылый, — дип сөйли алып баручы, им-томчы Аграфена Васильева. — Яфрак, чәчәкләр җыеп, шулар белән өйләрне, капкаларны бизиләр. Яшеллек — яңарыш, үзгәрешләр символы һәм ул шушы көнне искә алына торган үлеләрнең терелеп торуына ышануны да белдергән. Җир-суга рәхмәт әйтү дә бар. “Җапрак” бәйрәме булгач, кызлар яшь каен ботагы тотып, урамнар буйлап җырлап уза. Берәүләр тасма, икенчеләре адарынган сөлге-мазар яки башка әйберләрне шушы каенга бәйли. Урам әйләнгәч, каенны, чәчәк бәйләмен елгага агызып җибәрәләр. Кайсы кызның чәчәге ераграк китә, шул кияүгә тизрәк чыга, дигән ышану бар. “Җапрак” бәйрәменә дип шушы көннәрдә җыелган яфрак аеруча шифалы, файдалы була.
— Яфрак бәйрәменә кадәр җирдән үлән йолкырга, агач ботакларын сындырырга, су коенырга ярамаган, — дип сөйли Арча районы Яңа Сала авылы китапханәсе мөдире Фәридә Борһанова. — Табигатьнең бөтенлеген, тынычлыгын сакларга тырышканнар.
“Ак калфак” хатын-кызлар иҗтимагый оешмасы белән берлектә, без дә “Җапрак” бәйрәмен билгеләп үттек. “Каенлык аланы”нда каен себеркесе бәйләп, җырлап-биеп күңел ачтык, керәшен кардәшләрнең борынгы йолаларын искә төшердек.

Лилия ЙОСЫПОВА.