Айбагырлар Г.Тукай әдәби музеенда чыгыш ясадылар

Һәр милләт үзенең югала бара торган йоласын, җырларын, аш-суын халыкка күрсәтергә тырыша, милли байлыкны саклап калу өстендә эш алып бара. Концертта керәшеннәрнең борынгы җырлары яңгырады. Кодалар көе, аш-су көйләре, кунакларны каршы алу җырларын, керәшен язучыларының шигырьләрен тынлап үттек. В. Николаев башкаруында чабата биюен залдагы тамашачы бигрәктә яратып кабул итте. «Питрау» йоласын карадык.

Бәйрәм кунаклары арасында Мамадыш районының Шәдче авылы җирлеге башлыгы Валерий Шрыков та бар иде. Ул моңлы, матур тавышы белән башкарган җырлары тамашачы күңелен бик тиз яулап алды. Шулай ук гармунчы кунагыбыз А.Архипов бик матур көйләребезне музейда яңгыратты. Концертны Татарстанның атказанган артисты Елена Григорьева алып барды. Ул үзе иҗат иткән шигырьен, керәшеннәрнең бик матур җырын башкарып үтте. Музейга килгән тамашачы рәхәтләнеп ял итте, концерт бик җылы атмосферада үтте. Концертны үткәрергә ярдәм иткән музей хезмәткәләренә, Татарстанның халык артисты Галина Казанцевага бик зур рәхмәт. 

Казан шәһәре керәшен иҗтимагый оешмасы җитәкчесе Светлана Борисова.