Юрий Чуктиев: «Кечкенә вакыттан ук сәнгатькә гашыйк идем»

Сәнгать миңа һәрвакыт якын булды. Мәктәптә укыганда кечкенә спектакльләр куеп йөри идек. Төзүче дипломы да бар миндә, әмма сәнгать юлын сайладым. Хәзер инде ике кызым үсеп килә. Спектакльләргә бик теләп йөриләр, бәя дә бирәләр.

Драма театры белән чагыштырганда, курчак театры бераз уңайсызрактыр. Әмма драма театрында сәхнә буенча биеп, җырлап йөрергә кирәк, без күбрәк ширма артында. Хәзер алга таба барабыз, курчак театрында да ширма артыннан чыга башладык.

Без төрле образлар уйныйбыз. Кеше образлары да бар бездә, әмма әкиятләр булгач, балалар күбрәк хайваннарны: этләр, мәчеләр ярата бит. Шуңа күрә хайван образлары ешрак очрый. Әкиятне куяр алдыннан ук режиссер рольләрне бүлә. Кайберәүләр гел кеше образын уйный, хайван образларын уйнаучылар да җитәрлек. Дөресен генә әйткәндә, без универсаль актерлар, бөтенесен уйный алабыз.