Бер фотосурәт тарихы: Чистай ягы кызлары

Бу фотосурәт мине яшьлеккә алып кайта. Бу бик матур һәм җылы истәлек. Фотода 1986 елның июнь ае. Ел саен әтиләр (5-6 гаилә) безнең өчен табигать кочагында гаилә бәйрәме, кечкенә генә Сабантуй оештыралар иде. Әй күңелле дә була иде! Кечкенә, әмма чын күңелдән уздырылган Сабантуй. Табигать кочагында учак яна, казанда тәмле уха пешә, ә бөтен алан шат тавышлар, төрле кызыклы уеннар белән тулган, күңелгә якын бәйрәм. Фотоның арткы планында куе агачлар. Алар арасыннан кояш нурлары яктырта. Ә менә шушы матурлык уртасында – без, 12-15 яшьлек кызлар тезелеп торалар. Сулдан уңга беренчесе мин, икенчесе Анна (Бачук дәдәйнең кызы), калган икесе сеңелләрем Наталья белән Светлана. Аларның йөзләрендә бәхет нурлары. Күзләре кояштай балкый, иреннәрендәге елмаю – иң ихлас, иң чын балачак елмаюы. Светлананың кигән ялтыравыклы сары күлмәге кояш нурында җемелдәве әле дә күз алдында, – дип сөйләде Нина Никитина.