«Тумар» һәм «Казансу» ансамбльләре «Крутушка» этник фестивалендә чыгыш ясадылар

Чарада Бөтендөнья татар конгрессының Милли Шура рәисе киңәшчесе, «Татарстан хатын-кызлары» төбәк иҗтимагый оешмасы җитәкчесе Зилә Вәлиева да катнашты.

«Крутушка» фестивале — Идел буе һәм Татарстан Республикасында уникаль этномәдәни һәм музыкаль вакыйга. Бу — күп кырлы традицион мәдәният дөньясына сәяхәт. Быел фестиваль кысаларында Россия һәм дөнья халыкларының заманча этник музыкасы һәм аутентик фольклоры, милли кухня, мастер-класслар һәм һөнәрчеләр ярминкәсе, арт-проектлар, күргәзмәләр, лекцияләр, балалар программалары, спектакльләр, кинофильмнар һәм мультфильмнар тәкъдим ителде.

Музыкаль юнәлешне төрле милләтләрнең этник мәдәниятен үстерүче сәхнә йолдызлары һәм заманча проектлар тәкъдим итте. Этнографик юнәлеш катнашучылары — Татарстан Республикасыннан һәм Россия төбәкләреннән үз халкының мәдәниятен саклаучылар һәм таратучылар. «Крутушка» үзенең программасы һәм атмосферасы белән өлкән һәм кече буыннарны берләштерүче гаилә фестивале булып тора.

Бу күркәм чараны оештыручы — «Крутушка» халыкара этник фестиваленең оештыру комитеты рәисе Бикмуллина Лариса Владимировна. Ул һәм аның командасы ел саен Татарстанга кызыклы, һәр халыкның асылын, матурлыгын саклаган коллективларны җыялар. Бу хакта Татар-информ язды.

Я. Емельянов исемендәге мәдәни үзәкнең «Тумар» һәм «Казансу» фольклор ансамбльләре дә әлеге этник фестивальдә чыгыш ясады.

«Тумар» кызлары (җитәкчеләре — Алина Ахметшина) фестивальнең беренче көнен бизәде. Сәхнәдән керәшен җыруларын, думбра моңын гына яңгыратып калмады алар, халыкны керәшенчә биетте дә. 

"Казансу"лар (җитәкчеләре — Павел Александров) шулай ук фестиваль кунакларына үзләренең матур җырларын бүләк итте, керәшеннәрнең түгәрәк җаулыгын бәйләү буенча мастер-класс та күрсәтте.

Фотолар: КРЯШЕН ҖОРТЫ

Керәшен дөньясындагы яңалыкларны МАХ-канал да карап барыгыз. 

Хәбәрләрегезне 89172509795 номерына языгыз, шалтыратып әйтегез.