Сәйтәктә челтәрләр үрүне дәвам итәләр

Без алар турында әледән-әле язып торабыз. Исегезгә төшерәбез, Сәйтәк авылының битараф булмаган халкы  хәрби операциядә катнашучылар өчен маскировка челтәрләрен сугышның беренче көннәреннән  ук үрә башлаганнар.

Ярдәмне оештыручыларның берсе – Сәйтәк клубы җитәкчесе Ясминур Гыйззәтуллина. Ул хәбәр иткәнчә,, алар бу эштә тәҗрибәләре булган кешеләрдән үрнәк алып эшли башлаганнар. Хәзерге вакытта аларның үзләрен һәркемгә үрнәк итеп куярлык.

– Әйе, катлаулы эш. Бер челтәргә ким дигәндә өч көн вакыт китә. Әзер булганнарын җибәрә барабыз. Алар сугышчылар өчен бик кирәк, авылдашларның безнең идеяне хуплавы куандыра. Эш күп вакыт таләп итә, әмма халык бик теләп ярдәмгә килә. Барыбыз да күңел биреп эшлибез, солдатларыбыз безнең ярдәмне тояр, дип ышанабыз. Без аларның сау-сәламәт булып, исән-имин кайтуларын көтәбез, – ди клуб җитәкчесе.