Монай авылы музеенда карендәшебез Мария Тихонова тапшырган экпонатлар

Бүген Монайда керәшеннәр, руслар һәм башка халыклар бик дус яши. Авыл халкы күбесенчә Менделеевскида эшли, чөнки Шәһәр авылдан нибары биш чакрым ераклыкта, шулай ук күрше Алабуга һәм Яр Чаллыда эшләүчеләр дә бар. Яшьләрнең күбесе шәһәрләрдә эшли һәм укый. Авылда колхоз һәм совхозлар булмау сәбәпле эш юк. 2013 елда Монайда клуб төзегәннәр, шунда ук авылның музей почмагы да бар.

“Халыкара музей көнендә авыл халкы музейдагы яңа экспонатлар белән танышты. Борынгы әйберләрне безнең авылда яшәүче Мария Тихонова бүләк итте. Бу көнкүреш әйберләренең барысы да аның әнисе Анна Степановна Созонова хуҗалыгында булган. Музей экспонатлары булып, бу әйберләр яңарачак, безнең музей почмагындагы күргәзмәләрдә һәм экспозицияләрдә халыкка тәкъдим ителәчәк. Һәр сакланган әйбер – ул шәхси тормыш шаһиты. Димәк, гаилә истәлекләрен вакытлар, буыннар бәйләнеше өзелмәсен өчен сакларга кирәк”, – дип язды клуб җитәкчесе Надежда Бакаева.