Мамадышта Валентина Максимова белән очрашу булган

Очрашуга Колышчы авылында яшәүче, керәшен киеме һәм бизәнү әйберләре белгече, этнограф Валентина Максимова, Раиса һәм Борис Усачевлар килгән.

Кичәдә әле күптән түгел генә басылып чыккан, керәшен этнографиясенә һәм культурасына багышланган «Мирас» ( «Наследие») җыентыгы турында да сөйләгәннәр. Валентина Петровна китап өстендә эшләү, аның әһәмияте турында сөйләгән.

Мамадыш районының китапханәсе әйтүенчә, укучылар керәшен киемнәрен, бизәнү әйберләрен, чигелкән бистәрләрен зур кызыксыну белән караганнар. Алар, шулай ук, керәшеннәрдә сакланган сирәк исемнәр һәм борынгы сүзләр турында да белгәннәр. Керәшеннәрнең элгәреге уеннарын да уйнаганнар.

Очрашу барышында концерт номерлары да булган. Мамадышның «Урагай» керәшен фольклор ансамбле чыгыш ясаган.

Ахырында Валентина Максимова  китапханәгә «Мирас» китабын бүләк иткән.

Фото Диляра Сафина.