Мамадышта уздырылган милли ашлар фестиваленә керәшеннәр 10 төр ризык әзерләгән

Район мәктәпләре әзерләгән 5 өстәл сый-нигъмәтләрдән сыгылып торган. Яңа пешкән камыр ризыклары һәм хуш исле чәй һәркемне җәлеп иткән. Бәйрәмгә килүчеләр керәшен, татар, рус, мари, удмуртларның аш-су традицияләре белән танышканнар. Алардан авыз итеп кенә калмаганнар, ничек әзерләгәннәрен сорашканнар. Керәшен ризыгы урын алган өстәл бай булуы белән аерылып торган. Анда пирмәнкә, тәбикмәк һәм төрле җиләктән ясалган вареньелар булган.

Бу керәшен өстәле турында Көек Ерыкса урта мәктәбе директоры Гөлнара Шәйхетдинова түбәндәгеләрне сөйләде:

«Район мәгариф бүлеге безгә керәшен өстәле әзерләргә киңәш иткәч, шатланып ризалаштык. Эшкә тотынганчы, без методист Энҗе Низамова белән интернеттагы рецептларны карадык, керәшеннәрнең үзләреннән дә сорадык. Җөри авылында күп еллар яшәүче техник хезмәткәребез Венера Никитина һәм район мәдәният йорты методисты Роза Галкина төп консультантларыбыз булды. Алар үз гаиләләренең яраткан ризыклары турында сөйләделәр, аларны ничек әзерләргә икәнен өйрәттеләр. Венера Харитоновна дучмак пешереп күрсәтте. Алар авылында аның формасы үзенчәлекле. Ә Роза Павловна әнисенең пирмәнкәгә эчлекне ничек әзерләвен сөйләде. Нәтиҗәдә, уртак тырышлык белән, без ун төргә якын камыр ризыгы әзерләдек. Бер өлешен алдан пешердек, бер өлешен – бәйрәм көнендә. Кунаклар безнең сый-нигъмәтебезне югары бәяләделәр».

Фото: Мамадыш-информ