Керәшен Сәрдәсеннән балта остасы Николай Дмитриевның эшләре авылга ямь өсти

Кулдан ясалган әйберләр бүгенге көндә дә игътибар үзәгендә. Агач кисү кемгәдер – һөнәр, ә кемгәдер – сәнгать. Эшен зурлаган кеше нинди генә эшкә тотынмасын, аны җиренә җиткереп башкара.

Керәшен Сәрдәсеннән Николай Дмитриевич агачтан үз куллары белән төрле әйберләр ясый: зәвык белән эшләнгән өстәл һәм урындыклар, кухня җыелмасы, сыерчык оялары, кирәк булса, эт оясын да эшли ала. Үз йортындагы кроват, тумбочкалар да агачтан үзе эшләгән.

«15 ел элек бу эш белән шөгыльләнә башладым. Башта үзем өчен өстәлләр, урындыклар ясый идем. аннары сыерчык ояларын да ясый башладым. Интернетта төрле кызыклы әйберләрне күреп алып, аларны да ясап карау теләге туды. Агачтан эшләнгән әйберләр нык була шул инде», – дип сөйли Николай дәдәй.

Аның эшләре авылга бер ямь өстәп тора.

«Николай Дмитриевич эшләгән мунча буралары ярты авылны җылыта. Чишмә бурасы бөтен авылны шифалы су белән тәимин итә, кое, тегермәннәре авыл башында каршы алып, бар кешене сокландыра», – дип әйтә авылдашлары.

Николай дәдәй үзе дә горурланып «Үзем өчен түгел, халык өчен башкарам бар эшемне!» ди.

Евдокия Никитина фотолары