Карендәшләребез Зәйдә «Уйнагыз,гармуннар!» фестивалендә катнаштылар

Быел әлеге фестиваль Зәй районының иң яхшы гармунчыларын, баянчыларын, фольклор коллективларын һәм күрше район кунакларын 30нчы тапкыр бергә җыйды. Безгә бу хакта Сәвәләй авылы мәдәният йорты җитәкчесе Ләйлә Сабаева хәбәр итте.

«Программага Бөек Җиңүгә багышланган җырлар һәм көйләр кертелде. Без шушы темага багышланган күргәзмәләр эшләп куйдык. Сәвәләй авылыннан Владимир Кашаев катнашты. Чыгышларны гадел жюри бәяләде, Владимир Кашаевка да бүләк бирелде. Көн салкын дип тормаганнар, тамашачылар күп җыелган иде. Фестивальнең рәсми өлешендә алып баручылар катнашучыларны һәм тамашачыларны бәйрәм белән котладылар, легендар Зәй гармунчысының халык сәнгатен үстерүгә керткән өлешен билгеләп үттеләр. Алар арасында җирле талантлар гына түгел, Түбән Кама районы гармунчылары да булды. Фестивальдә шулай ук балалар музыка мәктәбендә тәрбияләнүчеләр дә катнашты.

Артистлар башкаруында татар, керәшен һәм автор җырлары, шулай ук халык күңелле итеп бии һәм җырлый торган көйләр яңгырады. Концерт программасы зәйлеләргә матур бәйрәм бүләк итте»,– дип сөйләде ул.