Иванай авылында балалар өчен Сабантуй оештырылды

Клуб янындагы мәйданчык бер көнгә чын бәйрәм үзәгенә әйләнде.

«Безнең төп максатыбыз — халкыбызның йола-гадәтләрен саклау һәм яшь буынга тапшыру. Шуңа күрә, бәйрәмдә балалар яратып уйнаган традицион уеннар: «Чүлмәк вату», «Кашыкка күкәй салып йөгерү», «Аркан тартыш», «Капчык киеп йөгереш» һәм «Таяк тартыш» кебек ярышлар оештырдык.

Ә бәйрәмнең иң дулкынландыргыч һәм кызыклы өлеше — күз бәйләп, бүләкләрне кайчы белән кисеп алу булды. Балаларның шат авазлары, көлүләре бөтен авылны яңгыратты, – дип сөйләде клуб җитәкчесе Нина Евдокимова. – Бу көнне без бары тик уеннар белән генә чикләнмәдек. Балаларга керәшен авылларында яшәгән әби-бабаларыбызның бәйрәм-йолалары, аларның үзенчәлекле уеннары турында да бик кызыклы итеп сөйләдек».

Фотолар Н. Евдокимовадан.