Иске Тәрбитнең мәктәп яны лагерена йөрүче балалар музейда булганнар

Китапханәче Лариса Васильева һәм клуб җитәкчесе Любовь Тимофеева сөйләвенчә, балалар өчен элгәреге көнкүреш әйберләре һәм халык һөнәрләре турында бик кызыклы әңгәмә уздырылган.

“Әңгәмә барышында балалар үзләрен кызыксындырган сорауларны бирделәр, Аеруча балаларны чигү, йон эрләү, пешекчелек кебек халык һөнәрләре кызыксындырды. Кер юу, май язу җайланмалары, көянтә белән чиләкләр турында күп төрле сораулар бирде алар. Бу эшләрнең ничек башкарылуы, нинди материаллар кулланылуы турында күп сораштылар. Алар кайбер экспонатларны кулларына тотып карадылар. Бу балаларда зур кызыксыну уятты һәм аларның тарихка, халык мәдәниятенә карата мәхәббәтен арттырды. Бу экскурсия балаларның хәтерендә озакка сакланыр һәм аларның киләчәктә дә музейларга килергә теләкләрен арттырыр”, – дип сөйләделәр мәдәният хезмәткәрләре.