Яңа Маты авылы волонтерлары маскировка челтәре үрүне туктатмый

“Хәлдән килгәнчә, тырышабыз. Бу бит кемнеңдер гомерен саклап калу һәм ул өенә исән кайтсын өчен мөмкинлек. Махсус хәрби операция зонасында якташларына ярдәм итү өчен оештырылган мондый бердәм зур команданың  һәр авылда булуы мөһим”,– дип сөйләде китапханәче Валентина Савельева.

Яңа Маты авылында маскировка челтәрләре үрү эше көн саен дәвам итә. Иртәдән үк авылның иң актив кешеләре китапханәдә җыела. Алар арасында өлкән яшьтәге түти-дәдәйләр дә, яшьләр дә бар. Һәркем үз өлешен кертергә тырыша: кемдер каркас әзерли, кемдер тукыма кисәкләрен кисә, ә кемдер челтәрне үрә. Эш бик тырышлык сорый, әмма волонтерларның йөзләрендә ару-талу билгеләре күренми. Аларның күңелләрендә бер генә уй: якташларына ярдәм итү, аларның гомерен саклап калу.