Бордыда махсус хәрби операциядәгеләргә гуманитар ярдәм әзерлиләр

Тукай районының Борды авылыннан Альбина Тимофеева махсус хәрби операциядәге ире Михаил янына барырга җыена. Бу — аның алтынчы баруы. Альбинаны юлга Борды халкы бергәләп әзерли.

Махсус операциядәге якташларына, Михаилның хезмәттәшләренә тапшыру өчен, Борды авылы мәдәният йортына җыелып, берничә сәгать эчендә йөз күкәйлек токмач кисеп киптергәннәр. Бу эштә авыл җирлеге башлыгы Роза Николаевна һәм волонтёрлык хәркәтенә кушылган хатын-кызлар гына түгел, хәтта балалар да катнашкан. 

Аерым алганда, Альбинаның улы Ярослав һәм мәдәният йорты җитәкчесе Нурия Рамазанованың оныгы Рамазан буй-буй киселгән камыр җәемнәрен токмач кискеч махсус җайланмадан чыгарырга булышканнар. Авыл укытучылары да 25 күкәйлек йорт токмачы кисеп биргәннәр. 

Штурм ротасындагы хәрбиләргә кыр шартлары өчен кирәк-ярак та әзерлиләр бордылылар. Бер тамчыдан күл җыелгандай, һәркем үз хәленнән, мөмкинлегеннән чыгып булышырга тырыша. 

Авыл халкына, әти-әнисенә һәм кызы белән улына кушылып, барлык карендәшләр исеменнән Альбинага имин юллар телибез, исән-сау йөреп кайтсын. «Без үз илебезне саклыйбыз», — дип, еракта Ватан кушкан бурычны үтәүче Михаилга, аның белән бер сафтагы ир-егетләргә уңыш юлдаш булсын.