Авыллар Питрауга әзерләнә: киңәшмәләр уздыралар, урамнарны тәртипкә китерәләр, бүләк җыялар

Сарман районының Ләке авылында, Питрауга әзерлек кысаларында, 2 июль көнне бәйрәм мәйданында җаваплы хезмәткәрләр, белгечләр, оешма җитәкчеләре һәм башкалар катнашында киңәшмә үткәрелде.

«Һәр оешмага эш бүлеп бирелде, район башлыгы Фәрит Хөснуллин бурычлар билгеләде. Питрау – 12 июльдә узачак», – дип хәбәр итә ләкелеләр.

Менделеевск районының Сәйтәк авылында бәйрәмгә бүләк җыйганнар. Олысы, кечесе керәшен күлмәкләре киеп авыл әйләнгәннәр. Авыл халкының кәефен күтәргәннәр.

Зәй районының Югары Баграж авылында да Питрауны көтеп алалр.

«Питрау бәйрәменә әзерлек юл кырыендагы агачларны агартудан башланды.  Арысак та, эшләгән эшебезнең нәтиҗәсе күңелләрне күтәрде», – дип сөенә авыл халкы.

Сәвәләй авылында да Питрау бәйрәмен оештыру буенча киңәшмә узган. Бәйрәм программасы ачыклаганнар.