Алан Полян халкы Фәридә Сафинаны медицина хезмәткәре генә түгел, туганнары кебек күрәләр

Әлеге ханымның тормыш юлы – үз эшенә тугрылык үрнәге, аның һәр көне кешеләр турында кайгырту белән тулы. Күгәрчен кызы, Алан Полянда үз кешеләре кебек кабул ителгән, озак еллар хезмәт юлы үтеп, авылдашлары өчен медицина хезмәткәре генә түгел, ә ышанычлы терәк һәм якын дуска әверелгән.

– Күгәрчен мәктәбен тәмамлагач, мин Түбән Кама медицина училищесында укыдым. 1985 елда юллама буенча Шеморбашка эшкә кайттым. Ул вакытларда юллар бик начар иде... Аеруча язын һәм көзен авыр булды – эшкә пычрактан йөрергә туры килде. Ләкин авыл халкының хөрмәте һәм яхшы мөнәсәбәте бу авырлыкларны тулысынча каплады, – дип искә ала Фәридә.

Бу сүзләр – истәлекләр генә түгел. Аларда үз эшеңә булган мәхәббәттән туган аерым ныклык ишетелә. Чөнки чын эш авырга һәм җиңелгә бүленми – ул бары тик тулы бирелгәнлекне генә таләп итә.

Фельдшерның төп бурычы – беренче медицина ярдәме күрсәтү. Ләкин авыл тормышында вазыйфалар даирәсе күпкә киңрәк: сәламәтлекне күзәтүдән алып пациентларны хастаханәгә оештырып җибәрүгә кадәр. Бу катлаулы эштә Фәридә Сафинага аның ире Исмәгыйль зур терәк булган. Аның оста йөртүе күп тапкырлар кешеләрнең гомерен саклап калган.

1994 елда Фәридә Сафина Алан Полян авылының фельдшер-акушерлык пунктында эшли башлый. Шул вакыттан алып бүгенге көнгә кадәр ул үз эшенә, яраткан һөнәренә тугры кала.

Бүген фельдшерның аерым игътибар үзәгендә – диспансеризация.

– Алан Полян авылында 80 яшьтән узган 12 өлкән яши. Аларның иң өлкәне – 89 яшьлек Мария Федотова. Авыл халкы диспансеризация узуга җаваплы карый. Бүгенге көнгә медицина тикшерүен 70 кеше узган инде.

"Процессны җиңеләйтү өчен анализларны үзебез алабыз. Һәр атнаның сишәмбе көнне аларны Котлы-Бөкәш амбулаториясенә алып баралар. Шулай ук без йөрәк эшчәнлеген тикшерү өчен ЭКГ ясыйбыз, – ди Фәридә Хәмитовна.- Озын һәм актив тормыш" милли проекты кысаларында без 65 яшьтән өлкәнрәкләрне район социаль яклау бүлеге биргән махсус машинада Көтле-Бөкәш табиб амбулаториясенә илтәбез. Анда аларны терапевт  карый. Болар барысы да сәламәтлекнең төрле тайпылышларын иртә стадияләрдә ачыклауга ярдәм итә.

Фәридәнең гаҗәеп үзенчәлеге – ул өлкән пациентларының авыру тарихларын карточкаларсыз хәтерли. Бу гади һөнәри хәтер генә түгел, ә чын борчылуның чагылышы. Авыл халкының аңа тирән хөрмәт белән каравы гаҗәп түгел.

Фәридә Сафинаның максаты – медицинаның фән генә түгел, ә шәфкатьлелек сәнгате булуын искә төшерү. Яхшы сүз белән ярдәм итү, өмет бирү, башкаларның авыртуын уртаклашу сәләте – бу сыйфатлар авыл фельдшерларын алмаштыргысыз итә.

Авыл офыклары

Фото: Фарваз Каюмова