Кәвәлдән Зоя Шипшова: «Газетаны кулыма алу белән, бер тында укып чыгам»

Питрәч районының Кәвәл авылында яшәүче Зоя Шипшова «Туганайлар» газетасы турында фикерләрен җиткерде.

— Күп еллар элек «Туганайлар» газетасы барлыгын ишеттем. Шушы көннән үк почта бүлекчәсенә барып аңа язылдым. Шуннан бирле һәр санын алдырам. Кулыма алуга, бик кызыксынып, бер тын белән укып чыгам. Әле ярый үзебезнең газетабыз бар, диеп сөенәм. Керәшен дөньясының барлык тормышын яктыртучы газета ул, эчтәлекле, барлык бастырылган язмалар җиренә җиткереп бирелә, аңлаешлы, укырга җинел. Газетабызның бигрәк тә «Көн һәм гамәл», «Кыскача» рубрикаларын, танылган олуг кешеләребез, галимнәребез, керәшеннәрнең үткәне, дине, кул эшләре осталары, киемнәр һәм бизәнү әйберләре турындагы язмаларны аеруча яратып укыйм. Шундый эчтәлекле газета чыгаручы редакция хезмәткәрләренә уңышлар, кубрәк укучылары булуын теләп калам.