Сарсаз-Баграж мәктәбендә педагогик киңәшмә узды

Эрнст Рәисович мәгариф җитәкчесе итеп агымдагы елда гына билгеләнде. Шуңа күрә ул шәһәр-районның һәр мәктәбендә булып, педагогик коллективлар белән якыннанрак танышуны үз алдына максат итеп куйган. Һәм мәгариф идарәсе башлыгы ноябрь башында педагогик коллективлар белән танышуны Сарсаз-Баграж мәктәбеннән башлап җибәрде.
Эрнст Рәисович эш визиты вакытында мәктәбебезнең тышкы һәм эчке бизәлешен, “Сандугач” балалар фольклор ансамбле чыгышын карады, мәктәп музее белән дә танышты. Киңәшмәне мәктәп директоры Валентин Мартемьянов ачып, мәктәп һәм педагогик коллектив белән таныштырды, ирешелгән уңышлар турында сөйләде. Тормыш иминлеге нигезләре укытучысы Радий Харитонов үз эш тәҗрибәсеннән чыгып, “Укучыларга патриотик тәрбия бирү” темасына доклад укыды. Шулай ук мәктәпнең укыту һәм тәрбия эшләре буенча директор урынбасары Ләйсән Данилина беренче чирек нәтиҗәләре һәм IХ класс укучыларының сынап карау имтиханы нәтиҗәләре белән таныштырды.
Эрнст Рәисович чыгышында Сарсаз-Баграж мәктәбен райондагы башка мәктәпләр белән чагыштырды, укытучыларның сорауларына җавап биреп, педагогик коллективның ныклы, тотрыклы булуына басым ясады.
Киңәшмә ахырында алдагы чиректә укыту сыйфатын күтәрү, бердәм дәүләт имтиханына әзерләнү буенча бурычлар куелды.

Тулырак: http://zainsk-rt.ru/news/ya%D2%A3alyiklar/sarsaz-bagrazh-mktbend-chirattagy-pedagogik-kishm-buldy