Сагыну

Кайтып барам туган якларыма,

Эш-эш диеп вакыт үтелгән.

Сине ташлап читкә китсәм дә,

Сизелерлек көннәр үтелгән.

Юлы, суы, газы булсын диеп,

Хыялландык япь-яшь чагында.

Армый-талмый йөкләр ташый идек,

Калырбыз дип туган авылда.

Кайтып киләм туган авылыма,

Моңсуланган, тузган, каралган,

Шау-гөр килеп торган авылымнан

Караңгыга чумган моң калган.

Күкрәгемә кочып җылытырлык,

Яшьләр юк бит хәзер авылда.

Язмыш җиле усал кагылды шул,

Көчләп куды безне калага.

Безнең хыял - шушы идемени,

Юк-юк, бүтән,башка иде ул!

Шау-гөр килгән урамнары белән

Йөрәгемдә мәңге калыр ул.

Асфальт юлы, суы, газы

Соңарыбрак килде авылга.

Авылымның көче бетте хәзер,

Бу байлыкны каршы алырга.