Керәшен Сәрдәсендә һәйкәл территориясендә ремонт эшләре оештырганнар

Сугыш афәтен үз җилкәсендә татыган кешеләр елдан-ел сирәгәя бара. Аларның каһарманлыгы һәр кешенең хәтерендә, язып калдырган истәлекләрендә  саклана. Яу кырыннан кайтмый калганнарның исемнәре һәр авылның түрендә урнаштырылган һәйкәлләргә уеп язылган. Халык үзенең батыр улларын онытмый. Авыл халкы шушы һәйкәлләрне яңарта, төзекләндерә, чистартып карап тора. Бу һәйкәлләрдә сугыштан исән-имин туган якларына кайтып җиткәннәрнең дә исемнәре кертелә. Бу көннәрдә күпчелек авылларда һәйкәлләр территориясендә җыештыру-чистару, төзекләндерү өмәләре үткәрелә.

«Һәйкәлләр — авыл көзгесе. Питрәч районының Керәшен Сәрдәсе, Көлкәмәр, Рус Сәрдәсе авылларында Бөек Җиңүнең 79 еллыгы җитү уңаеннан, Бөек Ватан сугышында һәлак булганнар һәйкәле территориясендә җыештыру һәм ремонт эшләре оештырдык. Бу эшкә авылдашлар теләп кушылды», — дип сөйләде авыл җирлеге башлыгы Николай Морозов.