Керәшен кызы Вероника Россиякүләм олимпиадада 4нче тапкыр призер булды

Татарстанның җыелма командасында республиканың төрле шәһәрләреннән 41 укучы катнашты, шул исәптән Мамадыш шәһәренең 4 нче  мәктәбеннән бертуган Вероника һәм Алина Антоновалар. Вероника 3 ел рәттән (2021, 2022, 2023 елларда) Казанда җиңеп, Курск, Екатеринбург һәм Түбән Новгород шәһәрләрендә узган Россиякүләм олимпиадаларда призер булган иде инде. Быел да, ул җиңүчеләр рәтендә. Ярышлар ике өлештән торган: теоретик һәм практик тур.

Вероника бәләкәйдән спортны үз итә. Мамадыш сәнгать мәктәбенең бию классын тәмамлый, шуның белән беррәттән, 4нче мәктәптәге спорт түгәрәгенә йөри. Акробатика, йөгерү, чаңгыда шуу белән шөгыльләнә.

Алина да апасы кебек спорт түгәрәгенә йөри. Быел аның Россиякүләм олимпиадада беренче катнашуы, призер булырга нибары 0,5-1 балл гына җитми калган.