Иманлы авыл

Урайга печән чабарга баргач, Бордыбаш кешесе бу иконаны табып ала. Таба да, чүпкә ташлый. Шуннан соң ул чирли башлый. Әти-әнисе багучыга алып бара. Багучы аңа: “Син бер изге төс тапканың, урынына илтеп куй”, – ди. Ул вакытта әле безнең авылда чиркәү булмый. Теге кешенең әтиләре-әниләре булышып, безнең авылга иман йортын шушы Спас бәйрәме алдыннан салып куялар. Элек нигезләр булмаган бит инде, нарат бүрәнәләрдән дүрткә биш метр зурлыгындагы иман йортын да дүрт таш өстенә утырталар. Ул егет шуннан соң терелгән, Спас ул “спаситель” дигәнне аңлата, Коткаручыны. Иман йортының да менә шул Спас исеме хәзергәчә калган.

Бордыбаш кешесе тапкан иконаның исеме – Серафим Саровский. Хәзер дә ул икона бар, ул бер кешедә, әмма алар аны чиркәүгә бирмиләр, – ди бордылылар.

Авылның престол бәйрәме – 29 августтагы чикләвек Спасы. Чиркәүнең дә исеме: “Нерукотворный образ Иисуса Христа”, ул – бит яулыгына Ходайның кодрәте белән төшерелгән үз төсе. 29 августтагы “Нерукотворный Спас” халык телендә Чикләвек Спасы дип тә йөртелә.

Авыл халкы 19 августта Урта Спасны иман йортында бик зурлап бәйрәм иткән. Җазыклар әйтеп, өлешләр алып, келәү иткәннәр. “Үзебезнең керәшен священниклары булмагач, 76 яшьлек рус кешесен чакырдык. Ул безгә алтарьдан русча әйтеп барды, ә без җавапны керәшенчә җырлар белән җиткердек. Матур итеп литургия, ә аннары, барыбызның да сәламәтлеге өчен молебен үткәрдек”, – дип хәбәр итте Борды авылы халкы.