Югарыбагражлылар “Әйлән-бәйлән” фестиваленә кушылды

Узган шимбәдә Югары Баграж мәдәният йорты шау-гөр килеп торды. Биредә "Әйлән-бәйлән" дип исемләнгән район фестивале кысаларында авыл үзешчәннәре Тройсын бәйрәмен сәхнәләштереп күрсәтте.

“Мәдәният йорты хезмәткәрләре бу чараны яшь буынга гоеф-гадәтләрне җиткерү һәм саклау йөзеннән әзерләде. Чарада мәдәният йорты каршында эшләп килгән һәвәскәрләр берләшмәләренә йөрүчеләр һәм авыл кешеләре катнашты. Әлбәттә, бүген коронавирус таралу вазгыяте белән бәйле рәвештә куркынычсызлык чаралары да күрелде. Ә бит милли бәйрәмнәребез, гореф-гадәтләребезне сәхнәгә чыгару, аларда балалар да катнашу яшь буынны аларны белеп үсүгә, мәдәниятебезнең югалмавына китерә”, -ди мәдәният йорты җитәкчесе Гөлшат Хрипунова.

Чарада Тройсын бәйрәме тарихы, йолалары турында сөйләделәр. Бәйрәм җырлый-җырлый залга яшь каен алып керү белән башланып китте.

Югарыбагражлыларга гына хас булган авылның престол Тройсын бәйрәме каен әйләнәсенә түгәрәккә басып, бары тик Югары Багражда гына җырлана торган "Тройсын” җыры белән дәвам итте. "Кашыкка салып йотарлык" керәшен кызларының җитез биюләре, Тройсынга атка утырып килгән Мамадыш керәшеннәре, җырлый-җырлый килеп кергән Зәйнең “Җиләк” фольклор ансамбле бәйрәмне җанландырып җибәрделәр. Тамаша җыр-биюләр, шигырь, такмаклар, шаян сүзләр белән үрелеп барды.

Фотолар Югары Баграж мәдәният йортыннан.

Зәй офыклары