Питрәчнең «Юнармия» бүлекчәсе Петр Гаврилов исемен йөртәчәк

Фрида Вәлитова, 12 декабрь 2025 - 10:32

123

Ватан Геройлары көне уңаеннан, Питрәч районының балалар иҗат йортында Бөек Ватан сугышында катнашучы, Советлар Союзы Герое Петр Гаврилов исеме рәсми рәвештә Бөтенроссия балалар-яшүсмерләр хәрәкәте «Юнармия»нең җирле бүлекчәсенә бирелде.

Питрәчнең «Юнармия» бүлекчәсе Петр Гаврилов исемен йөртәчәк

Җирле бүлекчә штабы начальнигы Евгений Агачевка Брест ныгытмасының легендар саклаучысы исеме бирелгәнлеге турында таныклык тапшырылды. Питрәч туган якны өйрәнү музее директоры Ләйсән Шәйхутдинова геройның тормышы һәм батырлыгы белән бәйле уникаль экспонатларны тәкъдим итте.

Чараны штаб начальнигы урынбасары Сергей Максимов ачты, анда «Юнармия» йорты җитәкчесе Эльвира Зиятдинова, Кораллы Көчләр ветераны Анатолий Гнездилов һәм башка хөрмәтле кунаклар катнашты.

Бу көнне Питрәчнең 1нче һәм 2нче мәктәпләреннән 40 укучы юнармиячеләр сафын тулыландырды. Балалар үзләренең беренче таныклыкларын алдылар.

Танатанадан соң, яңа юнармиячеләр һәм кунаклар өчен практик мастер-класслар оештырылды: АК-74 автоматын өлешләргә аерып җыю, туристлык төеннәрен бәйләү. Волонтерлар маскировка челтәрләре һәм костюмнар ничек ясалуын күрсәттеләр.

Шулай итеп, герой хәтере исемдә генә түгел, яшь буынны батырлык һәм патриотизм үрнәгендә тәрбияләү аша эш белән дә мәңгеләштерелде.