Югары Кондрата кызы Нина Чалмаевадан Балык шулпасы рецепты

Уха пешерү өчен уртача зурлыктагы елга балыгы кирәк. Бәрәңге (4-5 данә), башлы суган (1 данә), укроп, тәменчә тоз-борыч, лавр яфрак алабыз.

Балыкны чистартып, эре кисәкләргә турыйбыз. Башыннан шулпа пешереп сөзәбез. Шулпага балык салып, тоз-борыч сибәбез. Пешкән балык кисәкләрен шулпадан тишекле зур чүмеч белән алып, аерым бер тәлинкәгә салып торабыз. Шулпаны икенче катка сөзгәч, эре итеп туралган бәрәңге өстибез. Башлы суганны турап сибәбез. Лавр яфрагы салырга онытмыйбыз.

Тирән тәлинкәгә бер-ике кисәк балык, бер-ике чүмеч балык ашы салып, өстенә укроп сибәбез. Кемдер ухага каймак яки майонез салып ашый, ә мин — ухага андый тәмләткечләр өстәмичә, үз тәме белән ашау ягында. 

* * *
Ухага әче тәм чыкмасын өчен, балыкны чистартканда ук аның күзләрен һәм саңакларын алырга кирәк. 
* * *
Балык шулпасы үтә күренмәле булсын өчен, уха пешергәндә шулпа өстенә җыелган күбекне алып торырга кирәк. 
* * *
Уха сүрән утта пешерелә.
* * *
Сөзелгән балык шулпасына бераз лимон согы салырга да була.