«Бәрмәнчек» ансамбле артисты Юлия Туктарёва нагайбәкләрнең туй җыруын яздырган

«Кряшен чибяре-2015» титулы иясе Юля Туктарёва (Савельева) – Чиләбе өлкәсендәге Нагайбәк районының Остроленко поселогыннан. Ул  керәшеннәрнең «Бәрмәнчек» дәүләт фольклор ансамбле солисты. Казанның Н.Җиһанов исемендәге консерваториясендә укып, этномузыколог белгечлеге алып чыккан.

«Берничә ел дәвамында нагайбәк җыруы яздырасым килеп, шуны уйлап йөрдем. Максатым –  тыңлаучыга нагайбәкләр ничек һәм нәрсәләр җырлаган, шуны җиткерү. Нагайбәк кызы буларак, үз культурабызны саклау һәм популярлаштыруны үз бурычым дип саныйм. Шулай булмаса, бүгенге көндә мин «Бәрмәнчек»тә эшләмәс, үз җыруларыбызны башкармас идем. Шулай ук  «Нагайбәк такмаклары»н да яздырдым, анысын да интернет челтәрләрендә таба аласыз», – дип яза Юлия ВКонтактедагы үз битендә.